مشاهد وشواهد
محمد الامين مصطفي يكتب:-
الرجوع الي.. امدر الحبيبة!!
مدخل ااول
عبد الوهاب هلاوي
الشافنا راجعين لي ديارنا
اصلو ما كضب قريب
عما قريب الهمبريب
صدقني يا محجوب بعود
ويفتح شبابيك الحبيب
الخلوق لي جميل صلاتا
المساجد لي صلاتا
الكنايس والصليب
الشافنا راجعين لي ديارنا
اصلو ما كضب قريب
صدقني يا محجوب بعود
لامعابر لا في عابر
لا جوازات لاتذاكر
لافي زول عايش غريب
الشافنا عايشين نص ديارنا اصلو ما كضب قريب
الصغار لي رياضا تاني
الاناشيد والاغاني
الحكايات والحليب
بكرة تنطلق الإذاعة بي ثقافاتا وفنونا
بي اغانيها الحنونة
بكرة صوتك وردي يصدح بكرة صوت العندليب
عبد الوهاب هلاوي
حركة شارع الوادي بأم درمان تضج
بالحياة أصوات الباعة وحركة المركبات الخفيفة الثقيلة وناقلات الجنود
البشر من مختلف الأعمار ومختلف السحنات وكل واحد يحمل قصة كل واحد يحمل روية مكتملة الفصول و وحركة المواصلات تنساب من اقصي الريف الشمالي الي أعماق ام درمان القديمة بنسق عجيب واقبال طاغي للعودة للحياة شعب بقامة امة كاملة حركة الناقلات والبصات القادمة من البعيد
ربما من وراء الافق ومن وراء البحار ومن خلف المحيطات تحمل العايدين الي حضن الديار
البنوك فاتحة أبوابها وكذلك شركات الاتصالات لتسهيل خدمات الجمهورهي
فيها منظومة متكاملة تشكل لوحة عودة الحياة تدريجيا الي ام درمان
في السبعينيات من عمرها وخط الشيب
راسها وخط الزمن رسما على جبينهايحكي قصة انسانة تحب بلدها وتحب شعبها وتحب جيشها وتحب طين هذا الوطن الحبيب
كانت هذه المسنة تمتطي المواصلات المتجهة
إلى المهداوي
من منطقة الواحة و كانت تفتش في حقيبتها الصغيرة
ودموعها منهمرة
سالتها بتبكي في
شنو يا حاجة
دموعك غالية علينا
إجابت قروشي مالامة فيها دايرة ادفع حق المواصلات ماشة بيها
ولكن سرعان ما تهلل وجهها وابتسمت
الحمد لله لقيت قريشاتي مدسوسات في قعر الشنطة
ودار هذا الحوار
يا حاجةماشا وين
حي العمدة
لي حي العمدة عديل كدة
وما شة بي شنو
المواصلات شغالة
وماشةبراك
البجيني شنو يا ولدي الحمد لله الناس بدت ترجع جيرانا رجعو من الشمالية قاعدين ماكلين
شاربين والحمد لله
وجيشنا قاعد حارسنا شباب زي الورد ربنا يغطي عليهم وينصرهم
وماشة براك
اي يا ولدي البجيني شنو
ما شا اشوف بيتي اعقرو
عشان راجعين ليهو
الوضع كيف
الحمد لله
الا يغلبك قرشك
والحتة آمنة
وخدمات الموية والكهرباء دخلت الحمد لله
الا في حتات ناسا ما جو ومواسيرها
مكسورة قطعو منهم المويةاااي والله
وناس ابو روف وودنوباوي وبيت المال وكل
امدرمان القديمة الناس بدت ترجع
مدخل الختام
عبد الوهاب هلاوي
والشافنا راجعين سوقنا تاني اصلو ما كضب
قريب
صدقني يا محجوب بعود وافتح شبابيك الحبيب
كلو اول ليهو اخر
وكلو باكر ليهو باكر
والشوارع قلب حاضر
اصلو لا يمكن يغيب
الشافنا نايمين في ديارنا اصلو ما كضب قريب
عما قريب الهمبريب صدقني يا محجوب يعود ويفتح
شبابيك الحبيب
